१५ फागुन, चितवन

राष्ट्रिय स्वतन्त्र पार्टी (रास्वपा) का सभापती रवि लामिछानेले सिंहदरबार जलाउने र गोली हान्नेहरूको एउटै जात भएको बताएका छन् । अहिले देश जलाउने भनेर आरोप लागिरहेको भन्दै उक्त आरोप लगाउनेहरूले नै देशका सम्पत्तिमा आगो लगाएको ठोकुवा गरे ।

‘हामीसम्बद्ध कतिपय मानिसहरूलाई देश जलाउने भनेर आरोप पनि लगाइएको छ । म भन्न चाहन्छु हो– पहिले आन्दोलनमा आएकाहरूलाई ताकीताकी गोली हानियो । अनि मात्रै संरचनामा आगो लगाइएको हो’, उनले भने, ‘जल्नुहुँदैन थियो । गलत भयो । तर गोली ठोक्नु हुँदैन थियो । मान्छे मार्नु हुँदैन थियो । त्यहीँबाट बिग्रिएको हो ।’

सिंहदरबारलाई भ्रष्ट्राचारको अखडा बनाउनेले नै सिंहदरबार जलाएको र बालबालिकालाई गोली ठोकेको उनले दाबी गरे । उनले सिंहदरबारमा भ्रष्ट्राचार नभएको भए बालबालिका सुशासन र नेपोकिड्सको नारा नलिएर सडकमा नजाने तर्क गरेका छन् ।

‘तिमीले बेथिति बनायौँ, उनीहरू नारा लगाउन गए,’ लामिछानेले भने,’ ‘त्यसकारण सिंहदरबार जलाउने र बालबालिकालाई गोली ठोक्ने एउटै समूह हो । एउटै मानिसहरू हुन् । एउटै जात छ उनीहरुको ।’