एक टेलिभिजन अन्तर्वार्तामा विवादास्पद अभिव्यक्ति दिने अधिवक्ता भगवती पाण्डे विरुद्ध देशभरका जनजाति तथा आदिवासीहरु एक सातादेखि आन्दोलनरत छन् ।
खासगरी तामाङ र मगर समुदायको समाजका मानिसले दाजुबहिनीबिच बिबाह गर्ने चलनले समाजमा अपराधजन्य बिग्रह फैलिएको उनकाे अभिव्यक्ति विरुद्ध नेपाल मगर संघले पनि संगठित रुपमै देशैभर विभिन्न बिराेधका कार्यक्रमहरु गरिरहेकाे छ ।
साेहि क्रममा आज देशका सबै जिल्ला प्रशासन कार्यालयमार्फत गृहमन्त्रीलाई ज्ञापनपत्र बुझाएकाे छ । त्यसकाे निरन्तरतामा प्यूठानमा क्रियाशील नेपाल मगर संघले पनि प्रमुख जिल्ला अधिकारी समक्ष आफ्नो ज्ञापनपत्र बुझाएको छ । जिल्ला अध्यक्ष देवीराम पुनकाे नेतृत्वमा ज्ञापनपत्र बुझाइएको मगर संघका अगुवा नेता तथा शिक्षक नरबहादुर घर्तीले बताए ।
विवादित अभिव्यक्ति दिने अधिवक्ता भगवती पाण्डे गत साउन १७ गते पक्राउ परेकी छिन् । जिल्ला अध्यक्ष देवीराम पुनद्वारा हस्ताक्षरित विज्ञप्तिमा मगर तथा तामाङ समुदायमाथि कपाेलकल्पित आराेप लगाउने भगवती पाण्डेलाई हदैसम्मको सजायको माग गरिएको छ । विज्ञप्ति हस्तान्तरण कार्यक्रममा अध्यक्षसहित जिल्लाका पदाधिकारी, सल्लाहकार हरी बुढामगर लगायतको उपस्थिति रहेकाे सचिवालय सदस्य नरबहादुर घर्तीले प्राणमञ्चसँग बताए ।
ज्ञापनपत्र बुझ्दै प्रमुख जिल्ला अधिकारी मदन काेइरालाले अधिवक्ता भगवती पाण्डेकाे अभिव्यक्ति अनेकौं भाषा र साँस्कृतिक पहिचानसहित मिलेर बसेकाे नेपाली समाजमा खलल पुर्याउने गरि आएकाे बताए । उनले भगवती जस्ता कैयौं अल्पज्ञानिहरुकाे झुन्डले समाजमा जातिय, भाषिक, साँस्कृतिक तथा राजनीतिक द्वेष समेत फैलिएकोले यस्ता विषयमा सबै सचेत र सजक हुनुपर्ने बताए ।
