७ जेठ, काठमाडौँ
आइतबारको प्रतिनिधि सभा बैठकमा गृहमन्त्री रवि लामिछानेले बोल्न पाए । प्रमुख प्रतिपक्ष नेपाली कांग्रेसको लामो समयको अवरोध खुलेसँगै लामिछानेले बोल्न पाएका थिए ।
नेपाली कांग्रेसले सहकारी ठगी प्रकरणमा गृहमन्त्री लामिछानेमाथि छानबिनका लागि संसदीय समिति गठन गर्नुपर्ने माग उठाउँदै आएको थियो । उक्त मागमा कांग्रेस केही लचिलो भएपछि आइतबार सभामुख देवराज घिमिरेले रविलाई बोल्नका लागि समय उपलब्ध गराएका थिए ।
पछिल्ला बैठकहरूमा लगातार गगन थापाले सहकारी ठगी प्रकरणबारे बोलिरहेका छन् । वैशाख २८ गतेदेखि उनले सहकारी ठगीमा गृहमन्त्री लामिछानेमाथि टिप्पणी गर्न थालेका थिए । गृहमन्त्रीले महान्यायाधिवक्ता कार्यालयको दुरुपयोग गरी आफ्नालागि पत्र लेख्न लगाएको आरोप थापाले त्यस दिन संसद्मा लगाएका थिए ।
महामन्त्री थापाले हरेक बैठकमा लामिछानेको नाम तोकेरै छानबिन समिति बनाउनुपर्ने अडान लिने गरेका थिए । बजेट अधिवेशनको पहिलो दिन नै थापाले पोखराको छानबिन समितिको प्रतिवेदनदेखि महान्यायाधिवक्ता कार्यालयको दुरुपयोगसम्मका विषय जोड्दै गृहमन्त्री लामिछानेलाई खुला चुनौती दिएका थिए ।
पछिल्ला केही दिनमा समिति गठनको कार्यादेश बनाउने कुरामा पनि यही कुरा उठ्दै आएको थियो । एमाले र रास्वपा भने गृहमन्त्रीको नाम किटेर छानबिन समिति बनाउन नसकिने पक्षमा उभिएका थिए भने नेपाली कांग्रेस त्यसको ठिक विपरीत अडानमा अडिग थियो ।
आइतबार संसद्मा बोल्ने मौका पाएपछि लामिछानेले नेपाली कांग्रेसका महामन्त्री थापामाथि विभिन्न आरोप लगाए । बाख्राको अनुदान दुरुपयोगदेखि विदेशी एजेन्टसम्मको आरोप संसद् भवनबाट उनले कांग्रेस महामन्त्री थापामाथि लगाए ।
