३ असोज, बाँके
बाँकेको राप्तीसोनारीको–४ लालपुरमा मोटरसाइकल दुर्घटना हुँदा दुई जनाको मृत्यु भएको छ तीन जना घाइते भएका छन्।
बुधबार साँझ करिब ५ बजेतिर गाउँपालिकाको वडा नम्बर ४ स्थित हुलाकी सडक खण्ड अन्तर्गत लालपुरमा चोकमा दुई वटा मोटरसाइकल एकआपसमा ठोक्किँदा दुई जनाको मृत्यु भएको हो।
इलाका प्रहरी कार्यालय धामपुरका अनुसार विपरीत दिशाबाट आउँदै गरेका भे १२ प ३९९५ र भे १२ प ४८२८ नम्बरको मोटरसाइकल एकआपसमा ठोक्किँदा गम्भीर घाइते भएका दुबै मोटरसाइकल चालकको उपचारका क्रममा नेपालगन्ज मेडिकल कलेजमा मृत्यु भएको हो।
मृत्यु हुनेमा राप्तीसोनारी–४ घर भएका भे १२ प ३१९५ का ३५ वर्षीय चालक रामशरण थारु र सोही गाउँपालिकाको वडा नम्बर ३ खैरेनीका भे १२ प ४८२८ नम्बरका चालक १८ वर्षीय बसन्त थारुको सवा ६ बजे मृत्यु भएको प्रहरीको भनाइ छ।
घटनामा भे १२ प ३९९५ नम्बरको मोटरसाइकलको पछाडी सवार बर्दिया राजापुर– ४ घर भएर हाल राप्तीसिनारी-४ धामपुर बस्ने ३१ वर्षीय अजय दहित घाइते भएका छन्। उनको अवस्था गम्भीर रहेको छ।
भे १२ प ४८२८ नम्बरको मोटरसाइकलमा सवार राप्तीसोनारी–३ खैरेनीका १६ वर्षीय संगीत थारु र वडा नम्बर ३ खैरेनीकै २१ वर्षीय संजय थारु घाइते भएका छन्। उनीहरुको नेपालगन्ज मेडिकल कलेजमा उपचार भइरहेको प्रहरीले जानकारी दिएको छ।
