सवारी दुर्घटनाको दैनिक तथ्यांक हेर्दा अकालमा ज्यान गुमाउने नेपालीहरुकाे स्थिति कहालिलाग्दो छ । नेपालकाे पूर्वपश्चिमका कुनै न कुनै सडकमा दैनिकजसाे दर्जनभन्दा सवारी दुर्घटनामा हुने र अकालमा ज्यान नगुमाएकाे सायदै तथ्यांक फेला पर्छ ।

पछिल्लो चार दिनमा मात्र चार ठुला दुर्घटनामा परी २१ जनाको ज्यान गएको छ । शुक्रबार पोखरा र सुर्खेतमा भएका सार्वजनिक यातायात दुर्घटनामा नौजना, आइतबार कालीकोटमा सात र सोमबार बागलुङमा पाँचजनाको ज्यान गएको हो ।

सोमबार बागलुङ दुर्घटनामा एक, कालीकोटको पलाँता गाउँपालिका– ३, राडुमा आइतबार भएको क.१ज ५६ नम्बरको बोलेरो जिपको दुर्घटनामा १२, चितवनको भरतपुर महानगरपालिका–

२९ सत्रकिलोमा बस र माइक्रो एक–आपसमा ठोक्किँदा शुक्रबार भएको दुर्घटनामा एक र दैलेखबाट सुर्खेत आउँदै गरेको कर्णाली प्रदेश ०२००१ ख ०९९८ नम्बरको हायस शुक्रबार भएको दुर्घटनामा २६ गरी ४० जना घाइते भएका हुन् । उनीहरूको विभिन्न अस्पतालमा उपचार भइरहेको छ । त्यस्तै, सोमबार नै जाजरकोटका दुई ठाउँमा दुर्घटना हुँदा ३९ जना घाइते भएका छन् । यसबाहेक ससाना दुर्घटना हरेक दिन भइरहेका छन् ।

सोमबार बागलुङको जैमिनी नगरपालिका–८, छिस्तीबाट सदरमुकाम बागलुङ बजार आउँदै गरेको ग २ च ९२४७ नम्बरको पिकअप जिप जैदी हर्देवा पाखामा दुर्घटनामा परेको छ । दुर्घटनामा एउटै गाउँ केबईका पाँचजनाको मृत्यु भएको र एकजना घाइते भएको बागलुङ प्रहरीका सूचना अधिकारी केशव थापाले बताए ।

जिपचालक जैमिनी नगरपालिका– ८, केबईका ३८ वर्षीय महेन्द्र पुन, २० वर्षीया रश्मि श्रीस, ५० वर्षीया नन्दकली पुन, १७ वर्षीय नीरज श्रीस र ७५ वर्षीय कुलप्रसाद श्रीसको ज्यान गएको हो । दुर्घटनामा घाइते केबईकै ४५ वर्षीय गंगाबहादुर श्रीसको धौलागिरी अस्पताल बागलुङमा उपचार भइरहेको छ ।

प्रहरी निरीक्षक थापाका अनुसार घाइतेको उपचार भइरहेकाले दुर्घटनाको कारणबारे सोधपुछ हुन सकेको छैन । तर, कच्ची र साँघुरो सडकमा स्टेरिङ फेल अथवा ब्रेक फेल भएको अनुमान गरिएको उनले बताए ।

जाजरकोट दुर्घटनाका ११ घाइतेलाई हेलिकोप्टर मार्फत सुर्खेत लगियो
जाजरकोटको भेरी नगरपालिका र नलगाड नगरपालिकामा भएका छुट्टाछुट्टै दुर्घटनाका ३९ घाइतेमध्ये ११ जनालाई उपचारका लागि सेनाको हेलिकोप्टरमार्फत सुर्खेत लगिएको छ । गम्भीर घाइते ११ जनाको कर्णाली प्रादेशिक अस्पताल सुर्खेतमा उपचार भइरहेको स्वास्थ्य सेवा कार्यालय जाजरकोटका प्रमुख डा. सुनील पुनले बताए । अन्यको स्थानीय स्वास्थ्य संस्थामा उपचार भइरहेको छ ।

जाजरकोट सदरमुकामबाट नेपालगन्जका लागि छुटेको बा ५ ख १८९२ नम्बरको फोर्स गाडी दुर्घटना हुँदा ३२ जना घाइते भएका थिए । त्यस्तै, बारेकोट गाउँपालिकाबाट सदरमुकामतर्फ आइरहेको भे १ ज ५९५ नम्बरको बोलेरो जिप दुर्घटना हुँदा सातजना घाइते भएका थिए । दुवै गाडीको ब्रेक फेल भएर दुर्घटना भएको जाजरकोट प्रहरी प्रमुख पुरुषोत्तमप्रसाद पाण्डेले बताए ।