४ मंसिर, बाजुरा
६ महिना अघि खच्चड फसेको कर्णाली नदीको झोलुङ्गे पुल अझै मर्मत हुन सकेको छैन । स्थानीयबासी त्यही जोखिमपूर्ण अवस्थाको जीर्ण पुलमा आवतजावत गर्न बाध्य छन् ।
अछामको पञ्चदेवल विनायक नगरपालिका–९ र दैलेखको आठबिस नगरपालिका–४ खिड्कीज्यूला जोड्ने कर्णाली नदी माथिको झोलुङ्गे पुलमा २७ जेठ २०८१ मा १४ वटा खच्चड अड्किएका थिए । उद्धारका क्रममा दुइवटाको मृत्यु भएको थियो ।
सो दिन बिहान अछामबाट दैनिक उपभोग्यवस्तु लिएर दैलेख हिडिरहेका खच्चड एक्कासी सो पुलको बिचमा फसेका थिए । फसेका १३ वटा खच्चडको झण्डै ६ घण्टापछि स्थानीय र प्रहरीले उद्धार गरेका थिए ।
सो झोलुङ्गे पुलमा खच्चड फसेको खबर संसारभरी पुग्दा सरोकारवालाहरुले तत्काल उक्त पुल मर्मत गर्ने वाचा गरेका थिए । झण्डै दुई दशकअघि बनेको सो पुलको नियमित मर्मत नहुँदा जीर्ण बनेको थियो । त्यसपछि खच्चड फसेर झनै जीर्ण भएको सो झोलुङ्गे पुलको हालसम्म पनि मर्मत गर्न कसैको ध्यान नगएको खिड्कीज्यूलाका स्थानीयबासीले गुनासो गरेका छन् ।
स्थानीयका भनाइमा, खिड्कीज्यूला नजिकै अर्को झोलुङ्गे पुल भएपनि त्यसको नजिकै मन्दिर रहेकोले सुत्केरी तथा छाउ (महिनावारी) भएकाहरु पनि त्यहाँबाट आवतजावत गर्दैनन् । त्यसैले खच्चड फसेको यो झोलुङ्गे पुल नै धेरैले प्रयोग गर्ने गरेका छन् ।
विद्यालय आउनेजाने छात्राहरुले पनि महिनावारी हुँदा यही जीर्ण पुल प्रयोग गरेर विद्यालय जानुपर्ने बाध्यता रहेको स्वास्थ्यकर्मी बम बताउँछन् । ‘सुत्केरी तथा छाउ भएका त तलबाट जाँदैन थिए, अरुलाई पनि टाढा भएकाले धेरैले यही पुल प्रयोग गर्छन्,’ उनले भने ।
दैलेखका प्रमुख जिल्ला अधिकारी नवराज जैसीले यो खच्चड फसेको घटनापछि आफू जिल्लामा आएकाले पुलबारे धेरै बुझ्न नपाएको बताए । अब तत्काल सो स्थानमा गएर अवस्था बुझने उनको भनाइ छ । ‘म अवस्था बुझेर पुल बनाउन सम्बन्धित निकायलाई तत्कालै आग्रह गर्नेछु’ प्रजिअ जैसीले भने ।
-अ.ख.
