२ फागुन, सल्यान

नेपाल कम्युनिष्ट पार्टीका महासचिव नेत्रविक्रम चन्द ‘विप्लव’ले २०८४ को चुनावमा नेकपाले पनि चुनाव लड्ने उद्घोष गर्नु भएको छ ।

देश र जनताले आमूल परिवर्तन खोजेकाले जनताले चाहेमा र साथ दिएमा आफ्नो पार्टीले चुनाव लड्ने बताउनुभएको हो । जनयुद्ध दिवसको अवसरमा विपीन भण्डारी फाउन्डेसनद्वारा सल्यानको बागचौरमा आयोजित विपीन भण्डारी मेमोरियल पार्कको उद्घाटन तथा बेपत्ता योद्धा विपीन भण्डारीको शालिक अनावरण गर्दै उहाँले यस्तो बताउनुभएको हो । देशलाई सुन्दर, शान्त र राम्रो बनाउन आवश्यक छ, जनता परिवर्तनको पक्षमा छन्, सोच नबदल्ने दल र नेताबाट पार लागेन, चुनाव जितेर संसदमा छिरेपछि जनताका सवाल बिर्सनेबाट विकास र समृद्धिको आश गर्नु बेकार हो’– उहाँले भन्नुभयो– ‘सरकार कसरी चलाउने, देश कस्तो बनाउने, जनतालाई कसरी अधिकार सम्पन्न बनाउने भन्ने बारेमा हामीले सोचेका छौं, एकपटक जनताले साथ दिनुहुन्छ भन्ने विश्वास छ, जनताले चाहेमा आउँदो ८४ मा हामी चुनाव लड्छौं, युवा मैदानमा उत्रन्छन् ।’

नेकपा जनताको सेवा गर्न हिडेको पार्टी भएकाले एकपटक जनताको सेवा गर्न चाहेको बताउनुभयो । ‘जनताको सेवा गर्ने हाम्रो चाहना हो, हाम्रो पार्टी उत्पादनमा जुटिसकेको छ, धान, गहुँ, आलु उत्पादनमा लागेका छौं, जुम्लामा स्याउ रोप्ने, माथिल्लो भेगमा भेडा पाल्ने हाम्रो सोच छ’– उहाँले भन्नुभयो– ‘अबको ५ वर्षभित्रमा उत्पादनमा जोडिएर पार्टी आत्मनिर्भर बन्छ, अब चन्दा मागेर पार्टी चल्दैन ।’

महासचिव विप्लवले संसद छिरेपछि माओवादी बिग्रेको दाबी गर्नुभयो । माओवादीकै बलमा गणतन्त्र आएको हो तर माओवादी संसद छिरेपछि जनताका सवाल ओझेल परे, गल्ती माओवादीले गरेकै हो, गल्ती माओवादीले गर्नुहँुदैन भनेर आवाज उठाएकै हो’– उहाँले भन्नुभयो– ‘देशमा परिवर्तन आयो तर सोचे जस्तो परिवर्तन आएन, जता पनि कमिकमजोरी सबै देखिन थाले, त्यही भएर हामी फरक बन्न खोजेकै हो, फरक पार्टी बनायौं तर फुटेको भन्न मिल्दैन ।’

उहाँले जनयुद्ध दिवस नेपाली जनताको उत्सवको दिनको रुपमा स्मरण गर्नुभयो । जनयुद्धले सबै नेपालीलाई अधिकार दियो, सबैको मुक्तिको लागि जनयुद्ध भयो, जनयुद्धले मुलुकलाई १०० वर्षअघि सारेको छ, जनयुद्ध हुन्थेन भने अहिले पनि देश केही ठूलाठूलाका हातमा हुन्थ्यो, महिला, दलित, जनजाति सबैको मुक्तिको लागि काम गरेको हो’– उहाँले भन्नुभयो– ‘गणतन्त्रको जग नै माओवादी हो, यसको शुरुवात फागुन १ नै हो, त्यसको नेतृत्व माओवादीले गरेको हो ।’

कार्यक्रममा नेता ठाकुर चापागाईं, नेपाली कांग्रेसका प्रदेश सहमहामन्त्री एकराज डाँगी, नेकपा एमालेका प्रदेश कमिटी सदस्य घनश्याम शर्मा, सिद्धकुमाख गाउँपालिका उपाध्यक्ष रामबहादुर बस्नेत, सहिद परिवारको तर्फबाट असल सीले बोल्नुभएको थियो । कार्यक्रममा विपीन भण्डारी फाउन्डेसनका सल्लाहकार ज्ञानेश्वर केसी, नेकपा माओवादी केन्द्रका कर्णाली प्रदेश सहइन्चार्ज टेकबहादुर बस्नेत, नेकपा माओवादी जिल्ला इन्चार्ज कीर्तिबहादुर पुन, नेकपा एकीकृत समाजवादीका बागचौर नगर कमिटी अध्यक्ष प्रेम डाँगीलगायतले बोल्नु भएको थियो । विपीन भण्डारी फाउन्डेसनका अध्यक्ष एकराज भण्डारीको अध्यक्षतामा भएको कार्यक्रममा डा. राम भण्डारीले स्वागत तथा कार्यक्रमको सञ्चालन आस्था सीले गर्नु भएको थियो ।