नेकपा (एकीकृत समाजवादी) का अध्यक्ष माधवकुमार नेपालले सरकार दलाल पुँजीपति र बिचौलियालाई पक्षपोषण गर्दै अघि बढेको आरोप लगाएका छन्।
आइतवार काठमाडौँमा आयोजित एक कार्यक्रमलाई सम्बोधन गर्दै उनले यस्तो बताएका हुन्। दलाल पुँजीलाई र बिचौलियालाई पोस्ने काम सरकारले गर्न खोजिरहेको उनको आरोप छ।
यसबारेमा भण्डाफोर गर्न पार्टी निकट पत्रकारहरूलाई आग्रह गरे। उनले समितिमा विचाराधीन रहेका विधेयकहरू फिर्ता नलिएसम्म अध्यादेश जारी गर्न नपाइने अवस्थालाई मिचेर सरकारले अध्यादेश जारी गरेको बताए। कानूनको रक्षक हुनुपर्ने सरकार आफैँ कानूनको भक्षक बनेको उनको आरोप छ।
अध्यक्ष नेपालले भने, ‘समितिमा विचाराधीन रहेका विधेयकहरू फिर्ता नलिएसम्म अध्यादेश जारी गर्न पाइँदैन। यो कानूनको खुलेआम उल्लंघन गरेर सरकार अघि बढेको छ। कानूनको रक्षक हुनुपर्ने सरकार आफैँ भक्षक बन्न पुगेको छ। संसद्को नियमित अधिवेशनमा कानूनमा सुधार गर्नुछ भने, विधेयक ल्याउनुछ भने त्यसको प्रक्रियाबाट अघि जानुपर्नेमा संसद्लाई छलेर अध्यादेश ल्याउने काम भएको छ। ६ वटा अध्यादेश ३० वटा कानूनमा संशोधन यसको पछाडि राम्रो नियत देखिँदैन। भूमि सम्बन्धी ऐनको बारेमा चर्चा भइसकेको छ। त्यसैगरी मिडियासँग जोडिएको नियन्त्रण गर्न खोज्ने नियत पनि स्पष्ट भइसकेको छ। यी सबै कुराको सन्दर्भमा भन्ने हो भने जसरी दलाल पुँजीलाई बिचौलियालाई पूरै पोस्ने काम सरकारले गर्न खोजिरहेको छ। यसको पनि तपाईंहरूले भण्डाफोर गर्नुपर्छ।’
अध्यक्ष नेपालले आफूहरूले विपक्षी दलहरूलाई बोलाएर सरकारको खबरदारी गरेको बताए। उनले आफूहरूले दिएको दबावबाट आत्तिएर सरकार अधिवेशन बोलाउन बाध्य भएको बताए। दबावकै कारण संसद्मा पेश गरेको अध्यादेशमा तत्काल अघि नबढाइएको बताए।
