१८ कात्तिक, काठमाडौं
नेकपा माओवादी केन्द्र छाडेका नेता राम कार्कीले अक्षम नेतृत्वलाई प्रतिस्थापित गर्न नसक्दा नेपालको कम्युनिष्ट आन्दोलन विघटन हुन पुगेको बताएका छन्।
नेकपा एकीकृत समाजवादी लगायतसँगको एकता सम्बन्धी एजेन्डा पारित गर्न नेकपा माओवादी केन्द्रको केन्द्रीय महाधिवेशन आयोजक समितिको बैठक चलिरहँदा अलग्गै पत्रकार सम्मेलन गर्दै नेता कार्कीले नेपालमा कम्युनिष्ट आन्दोलन विघटन हुन पुगेको बताएका हुन्।
यति वर्ष संघर्ष गर्दा पनि आफ्नो पार्टी नेतृत्वलाई सुधार गर्न तथा विस्थापित गर्न नसकेको भन्दै उनले समाजवादका निम्ति अब एकीकृत अभियान सुरु गर्ने बताए।
उनले विभिन्न समूहमा रहेका र विभिन्न दलमा रहेका सच्चा कम्युनिष्टहरूलाई एकीकृत समाजवादी अभियानमा जुट्न उनले आह्वान गरे।
कार्कीसँगै पत्रकार सम्मेलनमा माओवादीका तत्कालीन उपमहासचिव जनार्दन शर्मा पनि उपस्थित छन्।
