२३ कार्तिक, काठमाडौं
रुसले युक्रेनमा अर्को भीषण आक्रमण गरेको छ।
आक्रमणमा परी कम्तीमा ११ जनाको मृत्यु भएको रोयटर्सले जनाएको छ। सयौँ रुसी ड्रोनका साथै हावा, जमिन र समुद्रबाट प्रक्षेपण गरिएका मिसाइलले महत्त्वपूर्ण पूर्वाधारलाई निसाना बनाएको युक्रेनको सेनालाई उदृत गर्दै रोयर्टसले जनाएको छ।
युक्रेनको वायुसेनाले रुसी सेनाद्वारा स्थानीय समय शनिबार रातभर ५ सय ३ मिसाइल प्रक्षेपण गरिएका पत्ता लगाएको थियो। त्यसमा ४५ मिसाइल र ४५८ ड्रोन समावेश थिए। तीमध्ये अधिकांश मिसाइल प्रतिरक्षालाई छल्दै पार भएका थिए । जम्मा नौवटा मात्र सफलतापूर्वक खसालिएका थिए।
४ सय ६ ड्रोन रोक्न युक्रेनी वायुसेना सफल भएको दाबी गरिएको छ। रुसी आक्रमण मुख्यतया ग्यास र विद्युत् पूर्वाधारमा केन्द्रित थिए। सोही कारण धेरै क्षेत्रमा बिजुली आपूर्ति अवरुद्ध भएको छ।
जापोरिझिया क्षेत्रका विभिन्न जिल्लामा आवासीय भवनसहित अरू लक्ष्यमा प्रहार गरिँदा तीनको मृत्यु र ६ जना घाइते भएको जनाइएको छ। स्थानीय अधिकारीहरूका अनुसार डोनेट्स्कका दुई जिल्लामा अन्य दुईजनाको मृत्यु भएको छ।
करिब चार वर्ष लामो युद्ध अन्त्य गर्न खोजिने कूटनीतिक प्रयास क्रमशः कमजोर हुँदै गएको सन्दर्भमा यी घटनाको भएको अलजजिराले जनाएको छ।
युक्रेनमा कठोर जाडो नजिकिँदै गर्दा रुसको यो हमला युद्धको अर्को रणनीतिक अभियानको हिस्सा भएको जनाइएको छ।
