नेत्रविक्रम चन्द ‘विप्लव’ ले युद्धकालीन माओवादी ब्युँताएका छन् । सुरूमा नेकपा दर्ताका लागि निवेदन दिएका विप्लवले अर्को पार्टीसँग नाम जुधेपछि कम्युनिष्ट पार्टी नेपाल (कपाने) दर्ता गराएका थिए । अहिले माओवादीलगायतका घटक मिलेर नेपाली कम्युनिष्ट पार्टी दर्ता भएसँगै विप्लवले पुरानै नेकपा (माओवादी) कायम राखेर दल दर्ता गरेका हुन् ।

उनको दलको १०५ सदस्यीय केन्द्रीय समितिको नामावली निर्वाचन आयोगमा पेश गरिएको छ । निर्वाचन आयोगका एक पदाधिकारीका अनुसार विप्लवको पार्टीले ‘गुलाबको फूल’ निर्वाचन चिन्ह प्रस्ताव गर्दै महासचिवमा विप्लव र प्रवक्तामा खड्कबहादुर विश्वकर्मा ‘प्रकाण्ड’ रहने गरी १०५ सदस्यीय केन्द्रीय समितिको नामावली पेश गरेको हो ।

पेश गरिएको नामावली अनुसार स्थायी समिति सदस्यमा ६ जनाको नाम पेश गरिएको छ । जसमा महासचिव विप्लव र प्रवक्ता प्रकाण्ड बाहेक सन्तोषकुमार बुढामगर, छबिलाल सापकोर्टा उर्फ अनिल शर्मा, उमा भुजेल र भरतबहादुर बम रहेका छन् ।

यस्तै पेश गरिएको नामावली अनुसार पोलिट ब्यूरो सदस्य (पीबीएम) मा २५ जनाको नाम पेश गरिएको छ । जसमा महासचिव, प्रवक्ता र ४ जना स्थायी समिति सदस्य बाहेक १९ जना पिबिएम छन् । पिबिएममा देवानराज राई, नन्दबहादुर बुढामगर, माईला लामा, वालाराम थापा, भेषराज भुसाल, चुडामणी वली, अम्मरसिंह झाँक्री, केशबहादुर बाँठा, साबित्रा गुरुङ दुरा, खुमा सुवेदी, क्षेत्रबहादुर घिमिरे, एटम बिसी, नविनकुमार बिश्वकर्मा, बलबहादुर ओली, चन्द्रबहादुर खड्का, बन्धु चन्द, देवनारायण शाह र कान्छाराम तामाङ रहेका छन् ।

कालिकोटबाटै १६ जना

१०५ सदस्यीय केन्द्रीय समितिमा पार्टी प्रवक्ता प्रकाण्डको गृह जिल्ला कालिकोटका मात्रै १६ जना रहेका छन् । जसमा प्रकाण्ड र भरत बम २ जना स्थायी समितिमा र एटम बिसी र नविनकुमार विश्वकर्मा पोलिटब्यूरोमा छन् । दुबै जना प्रकाण्डको गृह पालिका नरहरीनाथ गाउँपालिकाकै हुन् ।

बाँकी १२ जना केन्द्रीय सदस्यमा नहकुल बहादुर शाही, धिरेन्द्रा उपाध्याय, विवेक कुमाल, कर्णबहादुर भण्डारी, दण्डविक्रम विश्वकर्मा, धनबहादुर बोगटी, गणेश बोगटी, शक्ति विक, राजकुमारी शाही, बलबहादुर बुढा, जनकबहादुर बिष्ट र दिर्शानाकुमारी शाही रहेका छन् ।

दोस्रोमा सबैभन्दा बढी रोल्पाका १२ जना केन्द्रीय सदस्य रहेका छन् । जसमा सन्तोषकुमार बुढामगर एक जना स्थायी समितिमा छन् भने उनीसहित नन्दबहादुर बुढामगर, चुणामणी वली, अम्मरसिंह झाँक्री, केशबहादुर बाँठा, खुमा सुवेदी ६ जना पोलिट ब्यूरोमा छन् । बाँकी ६ जना केन्द्रीय सदस्यमा पुर्णजित पुन, पदम केसी, सुन्दरकुमार वली, सम्झना घर्ती, दलबहादुर खत्री र देवबहादुर थापा रहेका छन् ।

विप्लवको गृह जिल्लाका ५ केन्द्रीय सदस्य

पार्टी महासचिव विप्लवको गृह जिल्ला कपिलवस्तुका ५ जना केन्द्रीय समितिमा रहेका छन् । महासचिव विप्लवकै पालिका र वडाका मात्रै ३ जना पोलिट ब्यूरोमा अटाएका छन् । पोलिट ब्यूरोमा विप्लवको गृह पालिका शिवराज नगरपालिका वडा नम्बर ९ बाट उनी बाहेक वालाराम थापा र भेषराज भुसाल रहेका छन् । पालिका र वडा बाहेक विप्लवको गृह जिल्ला कपिलवस्तुका बाँकी केन्द्रीय सदस्यमा टेकबहादुर पुन र मनिकर्ण केसी रहेका छन् ।

सिनियर छुटे तर जुनियर समेटिए

विप्लव नेतृत्वको कपानेले ३ वर्ष अघि कपिलवस्तुमा सम्पन्न पार्टीको नवौँ महाधिवेशनबाट चयन भएको केन्द्रीय समितिको नामावली आयोगमा पेश गरिएको दाबी गरेको छ । तर, कालिकोटबाट १८ जना र रोल्पाबाट १२ जना केन्द्रीय समितिमा अटाउदाँ कतिपय जिल्लाबाट भने एक जना पनि अटाउन नसकेको र कतिपय जिल्लाबाट बल्लतल्ल एक जना मात्रै अटाएको एक केन्द्रीय सदस्यले नेपाल प्रेससँग बताए ।

ती केन्द्रीय सदस्यका अनुसार कतिपय नवौँ महाधिवेशनबाट केन्द्रीय सदस्य बनेका नेता सूचीमा नअटाउदाँ कतिपय महाधिवेशनपछि मनोनित भएका केन्द्रीय सदस्य तथा वैकल्पिक केन्द्रीय सदस्य निर्वाचन आयोगमा पेश गरिएको केन्द्रीय समितिमा समेटिएका छन् ।

१०५ सदस्यीय केन्द्रीय समितिमा ३५ जना अर्थात ३३ प्रतिशत महिलाको प्रतिनिधित्व भएको छ भने जसमा एक जना उमा भुजेल ६ सदस्यीय स्थायी समितिमा अटाएकी छन् । २५ सदस्यीय पोलिट ब्यूरोमा ४ जना महिला अटाएका छन् । जसमा भुजेल बाहेक सावित्रा गुरुङ दुरा, खुमा सुवेदी र बन्धु चन्द रहेका छन् ।

१०५ सदस्यीय केन्द्रीय समितिमा १८ जना अर्थात १७ प्रतिशत दलितको प्रतिनिधित्व रहेको छ ।