१८ माघ, प्यूठान
प्युठानमा एक जना महिलाको हत्या गरेको आरोपमा उनकै श्रीमान् र देवर पक्राउ परेका छन् ।
गौमुखी गाउँपालिका–६ लिबाङकी १९ वर्षीया शर्मिला घर्तीको हत्या आरोपमा प्रहरीले उनकै श्रीमान् र देवरलाई पक्राउ गरेको हो ।
हत्या अभियोगमा २० वर्षीय श्रीमान् अनिल घर्ती र १८ वर्षीय देवर जनक घर्तीलाई पक्राउ गरी अनुसन्धान थालिएको प्युठानका प्रहरी प्रमुख प्रहरी नायब उपरीक्षक नरहरि अधिकारीले जानकारी दिए ।
अधिकारीका अनुसार दुई वर्षअघि प्रेम विवाह गरेका अनिल र शर्मिलाबीच पछिल्लो समय मनमुटाव र झगडा हुने गरेको प्रारम्भिक अनुसन्धानबाट खुलेको छ।
घटना १६ माघ बेलुका करिब ८ बजे भएको हो । प्रहरीका अनुसार अनिल र जनकले शर्मिलालाई घुम्न जाने बहानामा घरबाट करिब ६ सय मिटर टाढा गोन्द्रेचौर भन्ने स्थानमा लगेका थिए । त्यहीँ श्रीमान्–श्रीमतीबीच पुनः विवाद भएपछि अनिलले आवेशमा आएर शर्मिलाको टाउको फलामको रेलिङमा ठोक्काएका थिए।
टाउको ठोक्किएपछि बेहोस भएकी शर्मिलालाई दुवै दाजुभाइले भीरबाट तल खसालेर हत्या गरेको प्रारम्भिक अनुसन्धानका क्रममा खुलेको अधिकारीले बताए ।
उनका अनुसार एक पटक खसाल्दा करिब ३० मिटर तल अड्किएपछि पुनः खसाल्दा उनी करिब १०० मिटर तल पुगेकी थिइन्।
भिरबाट खसाल्ने क्रममा शव र शर्मिलाले लगाएको स्विटर सुरुमा रुखमा अड्किएको थियो। त्यसपछि अनिल आफैँ तल ओर्लिएर पुनः शर्मिलालाई भिरबाट तल धकेलेको प्रहरीको भनाइ छ।
करिब १०० मिटर तल खसेपछि शर्मिलाको मृत्यु भएको सुनिश्चित गरी उनीहरूले शवलाई घटनास्थलमै छाडेर घर फर्किएको प्रहरीको प्रारम्भिक निष्कर्ष छ।
१७ माघ दिउँसो करिब २ बजे कालीमाटी जंगलमा शव फेला परेपछि प्रहरीले अनुसन्धान सुरु गरेको थियो। घटनास्थलबाट मृतकको चप्पल बरामद गरिएको प्रहरीले जनाएको छ।
पक्राउ परेका अनिल र जनकलाई जिल्ला अदालतबाट पाँच दिनको म्याद थप गरी कर्तव्य ज्यान मुद्दामा थप अनुसन्धान भइरहेको अधिकारीले बताए ।
