४फागुन, काठमाडौं
बझाङको तल्कोट गाउँपालिकाको साइलाबगड नजिक जीप दुर्घटना हुँदा एकजनाको मृत्यु भएको छ। दुईजना घाइते भएका छन् ।
बझाङको तलकोटबाट चैनपुर आइरहेको से १ ज ८६८ नंको जिप तल्कोट गाउँपालिकाको साइलाबगड नजिक दुर्घटना भएको हो। जीप अनियन्त्रित भएर सडकबाट ७० फिट तल खसेको प्रहरीले जनाएको छ।
दुर्घटनामा तलकोट-१ की सुस्मिता कठायतको मृत्यु भएको हो। दुर्घटनापछि उपचारका लागि जिल्ला अस्पताल पुर्याउँदा चिकित्सकले उनलाई मृत घोषणा गरेको जिल्ला प्रहरी कार्यालय बझाङका प्रहरी नायब उपरीक्षक भरतबहादुर शाहले जानकारी दिए।
जीपचालक तलकोट–३ का राजेशकुमार कडाल र सहचालक मष्टा गाउँपालिका–५ का कमल कठायत घाइते भएका छन्। जिल्ला अस्पताल चैनपुरमा उनीहरूको उपचार भइरहेको प्रहरीले जनाएको छ ।
