१६ कार्तीक, रोल्पा, मिझिङ

श्री चन्द्रप्रभा माध्यमिक विद्यालय, मिझिङले तिहारको अवसरमा आयोजना गरेको भैलो तथा सहयोगात्मक सांस्कृतिक कार्यक्रममा ३६ लाख ९४ हजार ८ सय २ रुपैयाँ संकलन भएको छ।

विद्यालयले दिएको जानकारी अनुसार, संकलित रकममध्ये रु. २४ लाख ९१ हजार ९ सय ९२ अक्षयकोषका लागि र रु. १२ लाख २ हजार ८ सय १० दान स्वरूप प्राप्त भएको हो। त्यससँगै मुठीदान कार्यक्रम अन्तर्गत ५०० केजी चामल, २ पेटी तेल र १० केजी दाल पनि संकलन गरिएको भैलो परिचालन समितिका संयोजक तथा शिक्षक अभिभावक संघका अध्यक्ष मेघनाथ विष्टले जानकारी दिनुभयो।

भुपनारायण घर्ती मगर परिवारद्वारा विद्यालयको इतिहासकै ठूलो अक्षयकोष स्थापना

समाजसेवी एवम् बौद्धिक व्यक्तित्व श्री भुपनारायण घर्ती मगर र उहाँको परिवारले स्व. पूर्वमन्त्री श्री बालाराम घर्ती मगरको स्मृतिमा विद्यालयको इतिहासकै सबैभन्दा ठूलो रकम रु. ३,३३,३३३ अक्षयकोषको रूपमा स्थापना गर्नुभएको छ।
विद्यालयले उहाँ र उहाँको परिवारप्रति विशेष आभार व्यक्त गर्दै सो योगदानलाई विद्यालयको शैक्षिक तथा भौतिक विकासको लागि ऐतिहासिक उपलब्धिका रूपमा वर्णन गरेको छ।

अक्षयकोषमा ३० जना दानवीरको योगदान

विद्यालयले हालसम्म कुल ३० जना दाताहरूबाट अक्षयकोषका लागि रु. २४,९१,९९२ संकलन गरेको छ। भुपनारायण घर्ती मगर र उहाँको परिवार, जिवराज घर्ती मगर, अम्मर बहादुर थापा, थमन बहादुर गिरी, ओम प्रकाश विष्ट, धनश्याम पुन, पूर्ण बहादुर घर्ती मगर, तिल बहादुर वली लगायतका दाताहरूले अक्षय कोष स्थापना गर्नुभएको छ।

विद्यालय व्यवस्थापन समितिका अध्यक्ष केशरकुमार बिष्टका अनुसार अक्षयकोषबाट प्राप्त हुने ब्याज विद्यार्थीहरूको शैक्षिक गुणस्तर सुधार, प्रतिभा विकास, शैक्षिक सामग्री व्यवस्थापन र विद्यालयको भौतिक पूर्वाधार सुदृढीकरणका लागि प्रयोग गरिनेछ।

संस्कारगत जागरण अभियानमा ४ लाख संकलन

विद्यालयले विगत एक वर्षदेखि सञ्चालन गरिरहेको संस्कारगत जागरण अभियानले पनि उल्लेखनीय सफलता हासिल गरेको छ। सो अभियान अन्तर्गत हालसम्म झन्डै रु. ४ लाख संकलन भइसकेको विद्यालयका प्रधानाध्यापक ओमप्रकाश बिष्टले बताउनुभयो।

अभियानलाई अझ सशक्त रूपमा अघि बढाइने

विद्यालय व्यवस्थापन समितिका अध्यक्ष केशर कुमार विष्ट, प्रधानाध्यापक ओम प्रकाश विष्ट, र शिक्षक अभिभावक सङ्घका अध्यक्ष मेख बहादुर विष्टले सबै दानी महानुभावहरूलाई हार्दिक धन्यवाद व्यक्त गर्दै अक्षयकोष अभियान, मुठीदान कार्यक्रम र संस्कारगत जागरण अभियानलाई अझ सशक्त रूपमा निरन्तर अघि बढाइने घोषणा गर्नुभएको छ।

विद्यालयले भैलो कार्यक्रम मार्फत यसरी रकम सङ्कलन गरेको कुरा पूर्वी रोल्पाभर चर्चाको विषय बनेको छ।