२७ कार्तिक, सुनिलस्मृति (रोल्पा)
रोल्पाको सुनिलस्मृति गाउँपालिका–३ मा अवस्थित श्री चन्द्रप्रभा माध्यमिक विद्यालयले आफ्नो ६७औं वार्षिकोत्सव उद्घाटन समारोह भव्य रूपमा सम्पन्न गरेको छ।
कार्यक्रमको उद्घाटन सत्रमा संस्कारगत जागरण अभियान अन्तर्गत विद्यालयलाई आर्थिक सहयोग पुर्याउने सहयोगी दाताहरू, तिहारमा आयोजित भैलो कार्यक्रममा दान सहयोग गर्ने दाताहरू, विद्यालयका अक्षयकोष स्थापनाकर्ता, साथै पूर्व व्यवस्थापन समिति अध्यक्षहरू र पूर्व प्रधानाध्यापकहरूलाई विद्यालय परिवारले फूलमाला र सम्मानपत्रद्वारा सम्मान गरेको थियो।
वार्षिकोत्सवको सुरुवात विद्यालय परिसरबाट बाजागाजासहित र्याली निकालेर गाउँका केही भाग परिक्रमा गरी औपचारिक कार्यक्रम आरम्भ गरिएको थियो। कार्यक्रममा सयौंको संख्यामा अभिभावक, जनप्रतिनिधि, समाजसेवी तथा स्थानीय समुदायका सदस्यहरूको उपस्थिति रहेको थियो।
कार्यक्रमका क्रममा विद्यालयका प्रधानाध्यापक ओमप्रकाश बिष्टले विद्यालयको वार्षिक आर्थिक प्रतिवेदन प्रस्तुत गर्नुभएको थियो। विद्यार्थीहरूले प्रस्तुत गरेका विविध सांस्कृतिक र शैक्षिक कार्यक्रमहरूले उत्सवलाई झनै आकर्षक बनाएका थिए।
सो अवसरमा समाजसेवी तथा बौद्धिक व्यक्तित्व भूप नारायण घर्ती मगर, वडा नं. ३ का अध्यक्ष दुर्गा बिष्ट, र प्रमुख अतिथि गाउँपालिका अध्यक्ष मणिराम बुढाथोकीलगायतले विद्यालयको प्रगतिमा योगदान दिने सबैप्रति आभार व्यक्त गर्दै शुभकामना मन्तव्य राख्नुभएको थियो।
कार्यक्रम शनिबारसम्म चल्नेछ र यसबीचमा विद्यार्थीहरूबीच विभिन्न शैक्षिक एवं अतिरिक्त क्रियाकलापहरू सञ्चालन हुनेछन्।
कार्यक्रमको सहजीकरण शिक्षक दुर्गाप्रसाद रोकाले गर्नुभएको थियो भने अध्यक्षता विद्यालय व्यवस्थापन समितिका अध्यक्ष केशर कुमार बिष्टले गर्नुभएको थियो। प्रमुख अतिथि मणिराम बुढाथोकी रहेका उक्त कार्यक्रममा विशिष्ट अतिथिहरूमा भूमि आयोग रोल्पाका अध्यक्ष सिमबहादुर बिष्ट र वडा नं. ३ का वडाध्यक्ष दुर्गा बिष्ट रहनुभएको थियो भने उपस्थित सम्पूर्णलाई विद्यालय व्यवस्थापन समितिका सदस्य प्रकाश घर्तीले स्वागत गर्नुभएको थियो।
