१२ मंसिर, सैनामैना (रुपन्देही)
प्युठानको गौमुखी गाउपालिका -०४ गाँउफाटा स्थायी घर भई हाल कन्चन -०२ विजयनगर निवासी श्रीमान मोहन जैसी र श्रीमती भुमा गिरीले आफ्नो प्रिय छोरी गुञ्जन जैसीको १२ औं जन्मदिनको अवसरमा ५ लाखको जीवन बीमा पोलिसी उपहार प्रदान गरेका छन्।
उनीहरुले आफ्नो छोरीको उज्ज्वल भविष्य र परिवारको आर्थिक सुरक्षालाई ध्यानमा राखी प्रभुमहालक्ष्मी लाइफ इन्स्योरेन्स मुर्गिया शाखामार्फत उक्त बीमा उपहार दिएका हुन्। सो अवसरमा उनीहरूले बीमा योजनामा जोड्ने सल्लाह दिएको सिनियर एजेन्सी म्यानेजर टंक बहादुर केसीप्रति विशेष आभार प्रकट गरे।
जन्मदिनमा देखासिकी र तडकभडक खर्च भन्दा पनि सकारात्मक सन्देश दिने किसिमले जीवन बीमा उपहार दिएको उल्लेख गर्दै, आजको सानो बचतले भविष्यमा ठुलो आर्थिक सहारा पुग्ने बताए। साथै, भविष्यमा प्राप्त हुने रकमले छोरीको उच्च शिक्षामा सहयोग पुर्याउने लक्ष्य रहेको पनि परिवारले स्पष्ट पार्यो।
सो अवसरमा मुर्गिया शाखा प्रमुख ऋषिराम चुदालीले जीवन बीमा गर्नु भनेको केवल मृत्यु सम्झनु मात्र नभई, परिवारलाई थप सशक्त र सुरक्षित बनाउने कदम भएको उल्लेख गर्दै सबैलाई जीवन बीमा योजनामा सहभागी हुन आग्रह गरे। उनले जीवन बीमाले धनी बनाउन नसके पनि गरिब बनाउन नदिने, र संकटको घडीमा आर्थिक ग्यारेन्टी दिने भएकाले सबै वर्गका मानिसले अनिवार्यरूपमा बीमा गर्नुपर्ने बताए । त्यसैगरी, प्रभु महालक्ष्मी लाइफ मुर्गिया शाखाका कर्मचारी निश्चल बस्नेतले जो–कोहीलाई जुनसुकै बेला आर्थिक संकट पर्नसक्ने भएकाले जीवन बीमा सबैका लागि अपरिहार्य भएको धारणा राखे।
उक्त बीमा पोलिसी हस्तान्तरण कार्यक्रममा शाखा प्रमुख ऋषिराम चुदाली, सिनियर एजेन्सी म्यानेजर टंक बहादुर केसी ,एजेन्सी म्यानेजर नारायण पौडेल र बुवा मोहन जैसीको उपस्थितिमा छोरी गुञ्जन जैसी लाई जन्मदिनको उपहारस्वरूप ५ लाखको बीमा पोलिसी प्रदान गरिएको थियो।
