मलेसियामा हुने एसीसी अन्डर–१९ महिला एसिया कप खेल्ने नेपाली टोलीको बिदाइ गरिएको छ।
नेपाल क्रिकेट संघ क्यानले बिहीबार एक कायक्रमबीच टिमको बिदाइ गरेको हो।
नेपाली टोली शुक्रबार मलेसिया प्रस्थान गर्ने छ। नेपाल यू–१९ विश्वकप एसिया छनोट च्याम्पियनको रुपमा प्रतियोगितामा सहभागी हुन लागेको हो।
महेन्द्रप्रसाद रिजालको प्रशिक्षणमा रहेको नेपाली युवा टोलीको कप्तानी पूजा महतोले गर्ने छिन् भने टिमको उपकप्तानको जिम्मेवारी सोनी पाख्रिनलाई दिइएको छ।
प्रतियोगिता मंसिर ३० देखि पुस ७ गतेसम्म मलेसियामा हुने छ। एसियाका ६ टोलीको सहभागिता रहने प्रतियोगिताको समूह एमा बंगलादेश, मलेसिया र श्रीलंका छन्। समूह बीमा नेपालसहित भारत र पाकिस्तान छन्।
नेपालले पुस १ मा पाकिस्तान र २ मा भारतको सामना गर्नेछ। दुवै समूहका शीर्ष २ टोली सुपर फोरमा प्रवेश गर्ने छन्। सिङ्गल राउन्ड रोविनका आधारमा खेलिने सुपर फोरका शीर्ष २ टोलीबीच फाइनल हुने छ।
