बैठकमा महासचिव विप्लवले ‘विशेष परिस्थितिको विशेष कार्यभार, दृढताका साथ पुरा गरौँ’ शीर्षकको राजनीतिक र सांगठनिक प्रतिवेदन पेस गरेका थिए । प्रतिवेदनमाथि सुझावका लागि विप्लवले पोलिटब्युरो बैठक बोलाएका थिए । बिहानसम्म पोलिटब्युरो सदस्यहरूले प्रतिवेदनमाथि आ–आफ्ना धारणा राख्ने क्रम सकिएको नेता अनिल शर्मा विरहीले जानकारी दिए ।
विरहीका अनुसार नेकपालाई कमजोर बनाउन दलाल पुँजीवादीले अदालतको प्रयोग गरेकाले त्यसको सशक्त प्रतिरोध गर्ने बैठकले निर्णय गरेको छ । ‘दलाल पुँजीवादी शक्तिहरूले संसद्मा आउने विश्वास गरेका थिए । तर उनीहरूको आग्रह हामीले नमाने पछि विभिन्न धम्की आइरहेका छन् । त्यसकाविरूद्ध सशक्त प्रतिरोध गर्ने निर्णय गरेका छौँ,’ बैठकको निर्णयबारे जानकारी दिँदै उनले भने ।
विप्लवको प्रतिवेदनमाथि मंगरबार केन्द्रीय सदस्यहरूले आ–आफ्ना धारणा राख्ने क्रम जारी रहेको उनले बताए । बैठक भोलिसम्म चल्न सक्ने उनको भनाइ छ । कात्तिक १८ गते जिल्ला अदालत काठमाडौँले विप्लवसहितका शीर्ष नेताहरूविरूद्ध ३५ दिने पक्राउ पुर्जी जारी गरेपश्चात् आक्रोशित नेकपाका कार्यकर्ताहरू न्यायपालिका र न्यायाधीशविरुद्ध यसअघि आन्दोलन गरेको छ । बैठकले प्रतिरोधसम्बन्धी कार्यक्रम बनाउनेबारे पनि छलफल भइरहेको विरहीले बताए ।
