१० कार्तिक, काठमाडौं
नवनियुक्त स्वास्थ्य तथा जनसंख्या मन्त्री प्राडा सुधा शर्मा जेनजी आन्दोलनमा घाइते भएर अस्पतालमा उपचारत बिरामीलाई भेट्न अस्पताल पुगेकी छन्। प्रधानमन्त्री सुशीला कार्की सरकारमा आइतबार स्वास्थ्य मन्त्रीमा नियुक्त भएकी प्राडा शर्मा सोमबार बिहानै त्रिवि शिक्षण अस्पतालमा पुगेर जेनजी आन्दोलनका घाइतेको स्वास्थ्य अवस्थाबारे जानकारी लिएकी हुन्।
जेनजी आन्दोलनका घाइतेलाई भेट्दा मन्त्री शर्मा निकै भावुकसमेत भइन्। ‘घाइतेहरूको अवस्था के कस्तो छ भनेर हेर्न आएको थिएँ,बिरामीहरूको अवस्था हेर्दाखेरी मलाई धेरै गाह्रो भयो’, उनले भनिन्, ‘म मुलुक आन्दोलनमा नजाओस् भन्न चाहन्छु । र जसले सरकारको विरोध गर्नुहुन्छ, चुनाव भाँड्न खोज्नुहुन्छ । त्यो नगर्नुस् भनेर म सबैलाई अनुरोध गर्न चाहन्छु । हाम्रो जनआन्दोलनको मर्म भने यी कुऋति, बेथितिहरू सबै हटुन् भन्ने थियो । त्यसका लागि आएका सकारात्मक सुझावहरूलाई ग्रहण गर्दै हामी सबैले त्यही दिशामा कार्यरत रहनुपर्छ । र मैले गरेका कामहरू कति, के भयो भन्ने कुरा म ट्रान्सपरेन्टली ढंगले देखाउनेछु भनेर पनि भन्नेछु ।’
यस्तै स्वास्थ्य मन्त्री शर्माले घाइतेहरूको उपचार अस्पतालले राम्रोसँग भइरहेकाे र केही घाइतेलाई लामो समय उपचार आवश्यक पर्नेसमेत बताएकी छन्।
उनले भनिन्, ‘तीन जना बिरामी भर्ना हुनुहुँदोरहेछ । उहाँहरूको उपचारमा कुनै कमी छैन, राम्रोसँग भइरहेको छ ।’ घाइतेहरूको हड्डी भाँच्चिएको, छालाको प्लास्टिक सर्जरी गर्नुपर्ने भएकाले समय लाग्ने र पटक—पटक शल्यक्रिया गर्नुपर्ने अवस्था रहेको उनले जानकारी दिइन् ।
मन्त्री डा. शर्माले त्रिवि शिक्षणमा उपचार भइरहेका तीन जना घाइतेमध्ये दुई जनाको अवस्था राम्रो रहेको र एक जनाको अवस्था गाह्रो रहेकाले आईसीयुमा उपचार भइरहेको बताइन् ।
यसअघि बिहानै मन्त्री प्राडा शर्मा काठमाडौंको सिनामंगलस्थित केएमसी अस्पतालमा रहेका जेन—जी आन्दोलनका घाइतेहरूको अवस्थाबारे पनि जानकारी लिएकी थिइन् । त्यस क्रममा उनले अस्पतालले उनीहरूको उपचारमा कुनै कमी नगरेको आफूले पाएको बताएकी थिइन्।
केएमसी अस्पतालले जेनजी आन्दोलनका क्रममा घाइते भएका ८३ जनाको उपचार गरेको र २ जना मात्रै अहिले उपचाररत रहेको बताइन्। उपचाररत घाइतेमध्ये एक जना महिला रहेकी र उनीमाथि आन्दोलनका क्रममा पेट्रोल बम प्रहार भएको पाइएको उनको भनाइ छ । अर्को एक घाइते गोली लागेर उपचाररत रहेको अवस्था सुधारोन्मुख रहेको बताइन् ।
उनले भनिन्, ‘केएमसीबाट ८३ जना जेन जी घाइतेहरूलाई उपचार गरिसक्नुभएको रहेछ । अहिले मैले २ जना बिरामी हेरेँ । अरु सन्चो भएर जानुभयो । एक जना महिलामाथि आन्दोलनका क्रममा पेट्रोम बम प्रहार भएको रहेछ, त्यो हेर्दा साह्रै दुःख लाग्यो । जेनजी छोरा रहेछन् । अर्को एक व्यक्तिलाई गोली लागेको रहेछ । उहाँको अवस्था जटिल नै छ । उहाँको अवस्था पनि सुधारोन्मुख रहेछ । उपचारमा अस्पतालले धेरै राम्रो गरेको रहेछ । यत्रो शहीद र घाइतेको बलिदान खेर जानु हुँदैन । हामी सबै त्यसतर्फ सचेत छौँ । गुड गभर्नेन्सको मुद्दा हामीले बिर्सिनु हुँदैन ।’
आइतबार मन्त्रालयमा पदभार ग्रहण गर्दा मन्त्री प्राडा. शर्माले जेनजी आन्दोलनबाट घाइते भएकाहरूलाई देशभर १६ वटा संघीय र प्रदेश अस्पतालमा मनाेपरामर्श केन्द्र स्थापना गर्ने निर्णय समेत गरेकी छन्। मानसिक स्वास्थ्यलाई प्राथमिकतामा राखेकाे उनले बताएकी छन्।
यस्तै स्वास्थ्यमन्त्री शर्माले जेनजी आन्दोलनमा शहीद भएका परिवारका सदस्यहरूको स्वास्थ्य सेवालाई प्राथमिकता दिँदै निःशुल्क स्वास्थ्य बिमा गरिदिने घोषणा गरेकी छन्। ‘जेनजी आन्दोलनमा शहीद भएका परिवारलाई नि:शुल्क स्वास्थ्य बिमा गर्ने याेजना बनाएकी छु। यसका लागि अर्थ मन्त्रालयसँग परामर्श गरेर काम अघि बढाउनेछु’‚ उनले भनिन्।
गत भदौ २३ र २४ गतेको जेनजी समूहको आन्दोलनमा घाइते भएका मध्ये अझै ११ जना अस्पतालमा उपचाररत छन् । आन्दोलन सकिएको डेढ महिना बितिसक्दा समेत अझै पाँचवटा अस्पतालमा ती घाइतेहरूको उपचार भइरहेको स्वास्थ्य तथा जनसंख्या मन्त्रालयले जनाएको छ ।
