१२ कार्तिक, सोलुखुम्बु
सगरमाथा आधार शिविर नजिकै रहेको लोबुचेमा अल्टिच्युड एयरको हेलिकप्टर दुर्घटना भएको छ । बुधबार बिहान ७:४३ मा लुक्लाबाट विदेशी पर्यटक लिन गएको अल्टिच्युड एयरको अल्फा माइक सेरा कलसाइन भएको हेलिकप्टर लोबुचे हेलिप्याडमा अवतरण गर्ने क्रममा हिउँमा चिप्लिएर दुर्घटना भएको हो ।
क्याप्टेन विवेक खड्का भने सकुशल रहेको प्रहरीले जनाएको छ । उद्धारका लागि आएकाले हेलिकप्टरमा क्याप्टेन खड्का मात्रै रहेको जिल्ला प्रहरी प्रमुख डीएसपी मनोजित कुँवरले बताए ।
बिहान ८:१५ मा हेलिकप्टर दुर्घटना भएको पुष्टि भएको प्रमुख जिल्ला अधिकारी लिलाकुमारी केसी पाण्डेले पुष्टि गरिन् । क्याप्टेन खड्कालाई कैलाश एयरको हेलिकप्टरमार्फत लुक्ला ल्याइएको डीएसपी कुँवरले बताए ।
हेलिकप्टरमा आगजनी नभएको र पल्टिएको अवस्थामा रहेको प्रहरीले जनाएको छ । खुम्बुमा बाक्लो हिउँ परेका कारण बिहानैदेखि हेलिकप्टरले पर्यटकको उद्धार गर्दै आएका थिए ।
