३१ जेठ, प्युठान
पछिल्लो समय सामाजिक सञ्जाल फेसबुक, टिकटक लगायत विभिन्न प्लेटफर्ममा चर्चित व्यक्तित्व मिनबहादुर बुढामगर ‘भेलु बाजे’को नाममा सालिक वा स्मारक निर्माण हुन लागेको भन्दै विभिन्न पोस्ट तथा टिप्पणीहरू सार्वजनिक भइरहेका बेला प्युठान नगरपालिकाले उक्त विषयलाई भ्रामक प्रचार भएको जनाएको छ।
प्युठान नगरपालिकाका नगरप्रमुख विष्णुकुमार योगीले भेलु बाजेको स्मरणमा सालिक, स्मारक, पार्क वा अन्य कुनै संरचना निर्माण गर्ने विषयमा नगरपालिकास्तरमा कुनै औपचारिक छलफल, योजना, बजेट विनियोजन वा निर्णय नभएको स्पष्ट पारेका छन्। उनले सामाजिक सञ्जालमा फैलाइएका अपुष्ट सूचना र हल्लाको पछाडि नलाग्न सर्वसाधारणलाई आग्रह गरेका छन्।
प्राणमञ्चसँगको कुराकानीमा नगरप्रमुख योगीले भने, “भेलु बाजेको सालिक बनाउने वा स्मारक निर्माण गर्ने विषयमा नगरपालिकाको कुनै निर्णय भएको छैन। यस्तो विषयमा न त नगरसभामा छलफल भएको छ, न कुनै योजना प्रस्तावित छ, न बजेट सुनिश्चित गरिएको छ।”
उनका अनुसार स्थानीय तहको बजेट तथा योजना निर्माण प्रक्रिया निश्चित विधि र प्रक्रियाअनुसार सञ्चालन हुने भएकाले सामाजिक सञ्जालमा प्रचार गरिएझैँ कुनै गोप्य वा अचानक निर्णय हुने अवस्था नै छैन। उनले पछिल्लो समय तथ्यभन्दा बढी हल्ला र अनुमानका आधारमा सूचना फैलाउने प्रवृत्ति बढ्दै गएको भन्दै जिम्मेवार ढंगले सूचना सम्प्रेषण गर्न सबैलाई आग्रह गरे।
यद्यपि नगरप्रमुख योगीले कुनै व्यक्तिको योगदान, लोकप्रियता वा सामाजिक प्रभावका आधारमा स्थानीय समुदाय, सामाजिक संस्था वा व्यक्तिहरूले आफ्नै पहलमा सम्मानजनक कार्यक्रम सञ्चालन गर्न चाहे त्यसलाई सकारात्मक रूपमा लिन सकिने बताए। तर त्यसलाई सरकारी कार्यक्रम वा नगरपालिकाको आधिकारिक योजना भनेर प्रचार गर्नु उचित नहुने उनको भनाइ छ।
यसैबीच, भेलु बाजेको गाउँबाट निर्वाचित प्युठान नगरपालिका- ५ का वडाध्यक्ष नन्दे पुनले पनि हालसम्म कुनै सरकारी निकायबाट सालिक वा स्मारक निर्माणका लागि बजेट स्वीकृत नभएको जानकारी दिएका छन्। गाउँका केही व्यक्तिहरूबीच भेलु बाजेको योगदान र लोकप्रियताबारे छलफल भए पनि त्यसले सरकारी निर्णयको स्वरूप नलिएको उनले स्पष्ट पारे ।
उनले भने, “स्थानीय तहका अघिल्ला योजनाहरू सम्पन्न भएर भुक्तानी प्रक्रियामा गएका छन्। नयाँ आर्थिक वर्षको योजना तथा बजेट निर्माणको तयारी भइरहेका बेला सामाजिक सञ्जालमा आएका यस्ता अपुष्ट प्रचारले अनावश्यक भ्रम सिर्जना गरेको छ।”
भेलु बाजे भनेर परिचित मिनबहादुर बुढामगर आफ्नो मौलिक बोली, विशिष्ट शैली र सामाजिक सञ्जालमा भाइरल भएका सामग्रीका कारण देशभर चर्चित बनेका थिए। विशेषगरी ग्रामीण जीवन, स्थानीय भाषा र अनौपचारिक अभिव्यक्तिका कारण उनले ठूलो दर्शकवर्ग बनाएका थिए। तर स्वास्थ्य समस्या तथा अस्वस्थ जीवनशैलीका कारण उनको २०८१ साल वैशाखमा निधन भएको थियो।
निष्कर्ष
भेलु बाजेको नाममा सालिक वा स्मारक निर्माण हुन लागेको भन्ने चर्चा अहिलेका लागि सामाजिक सञ्जालमा फैलिएको अपुष्ट हल्ला मात्र देखिएको छ। नगरप्रमुख विष्णुकुमार योगी, वडा अध्यक्ष नन्दे पुन तथा स्थानीय तहका जिम्मेवार पक्षहरूले समेत कुनै सरकारी योजना, बजेट वा निर्णय नभएको स्पष्ट पारेका छन्। त्यसैले तथ्य पुष्टि नभएका सूचनालाई आधार बनाएर निष्कर्षमा पुग्नु भन्दा आधिकारिक स्रोतबाट जानकारी लिनु आवश्यक देखिन्छ।
