१० साउन, अर्घाखाँची

बाँदरबाट हुने कृषि बालीको क्षति न्यूनीकरण गर्ने उद्देश्यले डिभिजन वन कार्यालय अर्घाखाँचीले २६ जना बाँदर हेरालु नियुक्त गरी प्रभावित क्षेत्रमा परिचालन गरेको छ।

कार्यालयले हालै प्रकाशित सूचनाअनुसार छनोट भएका हेरालुहरूलाई बाँदरको उपद्रव बढी रहेका क्षेत्रमा खटाइएको हो। उनीहरूले स्थानीय किसानसँग समन्वय गर्दै खेतबारीमा बाँदर प्रवेश रोक्ने, बाली संरक्षण गर्ने तथा किसानलाई आवश्यक सहयोग प्रदान गर्नेछन्।

अर्घाखाँचीमा बाँदरका कारण मकै, धान, तरकारीलगायतका बालीमा हरेक वर्ष ठूलो क्षति हुँदै आएको छ। यसबाट किसान प्रत्यक्ष प्रभावित भएपछि स्थानीयस्तरमै हेरालु परिचालन गर्ने कार्यक्रम लागू गरिएको डिभिजन वन कार्यालयले जनाएको छ।
कार्यालयका अनुसार हेरालु परिचालनसँगै स्थानीय समुदाय, सामुदायिक वन उपभोक्ता समूह तथा सरोकारवाला निकायसँगको सहकार्यलाई पनि थप प्रभावकारी बनाइनेछ। यस कार्यक्रमबाट मानव–वन्यजन्तु द्वन्द्व न्यूनीकरण हुनुका साथै कृषि उत्पादन संरक्षणमा उल्लेखनीय टेवा पुग्ने अपेक्षा गरिएको छ।