३ असार, काठमाडौं

सोमबार फेसबुकमा अलबिदा लेखेर सम्पर्कविहीन भई पछि सकुशल उद्धार गरिएका डाक्टर केशव श्रेष्ठले गृहमन्त्री रमेश लेखकलाई भेटेका छन् । मंगलबार बिहान उनले भैंसेपाटीस्थित मन्त्री क्वार्टरमै पुगेर लेखकसँग भेट गरेका हुन् ।

गृहमन्त्रीसमक्ष पनि उनले आफूले रामेछाप अस्पतालमा बस्दाको पीडा सुनाएका छन् । आफूमाथि अन्याय भएको र यसबारे सुनाउँदा कतैबाट पनि सुनुवाइ नभएको गुनासो उनले गृहमन्त्री लेखकसँग गरे ।

गृहमन्त्री लेखकले सोमबार डाक्टर श्रेष्ठको फेसबुक स्टाटस पढेर आफू चकित र चिन्तित भएको बताउँदै कठिन परिस्थितिमा पनि हिम्मतका साथ अघि बढ्न सुझाव दिएको गृहमन्त्रीको सचिवालयले जनाएको छ ।

बागमती प्रदेश स्वास्थ्य मन्त्रालयअन्तर्गत रहेर काम गरिरहेका श्रेष्ठ प्रशासनिक अन्याय, मनोवैज्ञानिक दबाब र झुटा आरोपका कारण आफू आत्महत्या गर्न लागेको भन्दै सोमबार बिहानदेखि सम्पर्कविहीन भएका थिए । फेसबुकमार्फत ‘अलबिदा’ लेखेर सम्पर्कविहीन भएका उनलाई प्रहरीले बालाजु क्षेत्रमा सकुशल फेला पारेका थियो ।

दुई वर्षभन्दा बढी समय रामेछाप जिल्ला अस्पतालमा काम गरेका उनी जेठ अन्तिम साता हेटौँडा सरुवा भएका थिए । आफूले सेवा गरेको रामेछाप अस्पतालबाटै आफूमाथि अमानवीय व्यवहार र अन्याय गरिएको उनले फेसबुक पोस्टमा लेखेका छन् ।

अस्पतालमा काम गर्ने क्रममा आफूविरुद्ध झुटा आरोप लगाइएको, धम्की र दबाब दिइएको उनले उल्लेख गरेका छन् । डा. श्रेष्ठले केही कर्मचारी मिलेर आफूलाई मानसिक रूपमा गलाउने काम गरेको आरोप पनि लगाएका छन् ।

गृहमन्त्रीसितको भेटमा पनि उनले यही कुरा सुनाएका छन् ।

रामेछाप अस्पतालबाट आफूलाई राति ९ बजे परिवारसहित काठमाडौं आउन बाध्य पारिएको र स्वास्थ्य मन्त्रालयले सुरक्षा नदिएको गुनासो उनले गरेका छन् । मन्त्रालय र स्थानीय प्रशासनले पनि आफूलाई न्याय र सुरक्षा नदिएको उनको गुनासो छ ।